Þetta er lífið svo einfalt er það

Heiðrún Fitness Sigurðardóttir er nýbökuð móðir en hún eignaðist gullfallega stúlku, Örnu, í sumar. Lífið hafði samband við margfaldan fitnessmeistarann og spurði um móðurhlutverkið og breytinguna sem fylgir því.

"Þetta er lífið svo einfalt er það. Ég hefði aldrei trúað því hvað þetta er yndisleg tilfinning. Maður finnur svo sannarlega núna fyrir því hver tilgangur manns er í lífinu þegar maður á svona kríli og það fyndna við þetta allt er að um leið og maður fékk barnið í fangið þá vissi ég uppá hár hvað ég átti að gera. Ég var nett búin að fá í magann yfir að "kunna" ekki á þetta hlutverk," segir Heiðrún.

Breytingarnar sem fylgja því að verða mamma? "Lífið hefur að sjálfögðu breyst mikið en samt ekki. Ég var bara vel undirbúin og hlakkaði svo til að takast á við þetta stóra hlutverk. Arna er svo vær og góð, sefur mikið og allar nætur svo það er auðvelt að halda sinni rútínu yfir daginn. Allt snýst um litlu snúllu og maður getur gleymt sér við það eitt að horfa á hana sofa."

Nú voruð þið mæðgur í berjamó. Hvernig gekk það? "Ég er svo mikil útivistarmanneskja og eyddi seinustu mánuðunum meðan ég var ólétt í að rækta grænmeti í garðinum í sveitinni minni og svo er alveg berjasjúk. Ég hef það frá mömmu minni en við förum á hverju ári í berjamó. Í ár var engin breyting þar á. Ein bestu kaup sem ég hef gert var babybjorn magapoki fyrir börn. Skelli Örnu í hann, teppi yfir og svo bara af stað. Hún steinsefur meðan ég týni. Hún er draumabarn. Ég týndi rúma 10 lítra í dag og á pottþétt eftir að fara oftar."