Kjaftar um kynlíf í beinni

"Hver man ekki eftir Dr. Love á sínum tíma? Þessi þáttur verður á svipuðum nótum þar sem hlustendur geta hringt inn og fengið svör," segir kynfræðingurinn Sigríður Dögg Arnardóttir en þann 10. september næstkomandi fer fyrsti útvarpsþáttur hennar, Kjaftað um kynlíf, í loftið á K100,5.

Þátturinn Kjaftað um kynlíf verður á faglegu og fræðandi nótunum en þó með skemmtilegu ívafi. Sigríði, eða Siggu Dögg eins og hún er kölluð, fannst vanta vettvang þar sem fólk gæti komið með spurningar um kynlíf.

"Ég er alltaf að leita leiða til að auka umræðuna um kynferðisleg málefni. Mér datt þetta í hug og fannst þátt á borð við þennan vanta hér landi en svona þættir eru mjög algengir og vinsælir erlendis," segir Sigga Dögg sem stendur vaktina milli 22-24 á mánudagskvöldum þar sem hún verður með opna símalínu ásamt því að svarar spurningum sem hún fær sendar í tölvupósti.

"Ég heiti að sjálfsögðu fullri nafnleynd en ég hef áður verið með innslög í útvarpi og sá þá hversu margir hafa áhuga á málefninu."

Sigga Dögg einbeitir sér að einu umfjöllunarefni í hverjum þætti og fær til sín gesti. Meðal þess sem verður til umfjöllunar í þættinum er BDSM-heimurinn, kynlífsráðgjöf og -meðferðir, kynlífstæki og erótískar bókmenntir.

"Ég fæ til mín konur sem eru með heimasölu á kynlífsleikföngum og fæ að vita hvað er vinsælast í dag, einnig fræðumst við um kynlífsráðgjöf og svo er ég að stofna erótískan bókaklúbb sem fær sitt pláss í einum þætti," segir Sigga Dögg, spennt að hefjast handa en hægt er að senda henni póst með spurningum eða ábendingum á sigga@siggadogg.is.

- áp