Slúðursagan um framhjáhaldið stenst ekki

Kjaftasagan um að David Beckham haldi við 32 ára óperusöngkonu, Katherine Jenkins, hefur ekki náð að blómstra í slúðurheiminum sem þrífst á slíkum Gróusögum. Ástæðan er sú að þau sjást einfaldlega aldrei saman. Katherine mætti til að mynda á árlega verðlaunahátíð sem var á vegum GQ tímaritsins í gærkvöldi klædd í þetta líka stórglæsilegan Stellu McCartney síðkjól sem fór ekki fram hjá nokkrum einasta manni. Þá var David myndaður í verslunarleiðangri klæddur í gráar joggingbuxur með húfu á höfðinu.

Katherine komst á forsíður slúðurblaða vestan hafs þegar hún skrifaði á Twitter síðuna sína að það væri alls ekkert á milli hennar og fótboltakappans sem er harðgiftur Victoriu Beckham og hefur verið undanfarin 13 ár. Skoða má myndir af Katherine á rauða dreglinum í myndasafni og David að versla inn.