Hraðari, hressari og skemmtilegri

„Það er mikil tilhlökkun í mannskapnum að hefja nýjan vetur," segir Björn Bragi Arnarsson, stjórnandi sjónvarpsþáttarins Týnda kynslóðin, sem hefur göngu sína að nýju í kvöld, en hann naut mikilla vinsælda síðastliðinn vetur.

„Þátturinn verður hraðari, hressari og skemmtilegri. Það er mikill metnaður í okkur," segir Björn.

Viðfangsefni fyrsta þáttarins er íslenska karlalandsliðið í knattspyrnu. „Við fengum nokkra af liðsmönnum liðsins til að gera einhverja vitleysu með okkur og það er bráðskemmtilegur þáttur í vændum," segir Björn.

Á meðal þess sem sjá má í kvöld er tilraun þar sem fyrirliðinn Aron Einar kastar heimilistækjum eins langt og hann getur, Rúrik Gíslason tekur lagið og markvörðurinn Gunnleifur Gunnleifsson leikur skúrk í kvikmyndaatriði. „Gulli sýndi ótrúlega leikhæfileika sem vondi karlinn. Það er augljóst hvað hann fer að gera eftir að knattspyrnuferlinum lýkur," segir Björn.

Líkt og síðasta vetur verður Nilli með innslög í þættinum. „Nilli heldur áfram að reyna að finna sig. Í fyrsta þættinum fór hann á hjólabretti. Þið getið ímyndað ykkur hvernig það gekk," segir Björn og hlær.

Týnda kynslóðin hefst klukkan 19:45. Þátturinn er í opinni dagskrá á Stöð 2 og Vísi.