Erlent

Glötuðu myndavélinni í Reykjavík - Internetið kom til bjargar

Unga parið frá Seattle.
Unga parið frá Seattle. mynd/Facebook

Netheimar sýndu fram á mátt sinn í dag þegar ungt par frá Seattle í Bandaríkjunum endurheimti myndavél sem þau höfðu glatað á Íslandi.

Atburðarásin hófst á Reykjavíkurflugvelli í síðustu viku. Ung kona fann þar stafræna myndavél á glámbekk og var eigandinn hvergi sjáanlegur. Hún hlóð ljósmyndunum inn á Facebook og biðlaði til notenda síðunnar um að deila myndaalbúminu.

"Frænka mín fann myndavél á Reykjavíkurflugvelli fimmtudaginn 22. mars 2012," var ritað við myndaalbúmið. "Nýjustu myndirnar voru teknar í Reykjavík."

Á myndavélinni voru einnig nokkrar ljósmyndir sem teknar höfðu verið í Bandaríkjunum.

Íslenskir Facebook-notendur tóku höndum saman og dreifðu upplýsingunum um veraldarvefinn.

Málið rataði jafnvel inn á heimasíður íslenskra fjölmiðla.

Það voru síðan úrræðagóðir notendur vefsíðunnar Reddit sem tóku málin í sínar hendur. Einn notandi hóf spjallþráð þar sem hann auglýsti eftir eigendum ljósmyndanna.

Þráðurinn fékk rúmlega 700 svör - þar á meðal fá einum sem kannaðist við stúlkuna á myndunum. Hún reyndist vera nágranni hans. Hann sendi henni skilaboð á Facebook og benti henni á albúmið á Facebook.

Hún hefur nú haft samband við fólkið sem er með myndavélina.





Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.