Fjölskyldufundur eftir hálfrar aldar leit

Vaxtarræktarjöfurinn Magnús Bess Júlíusson og unnusta hans, fitnessdrottningin Katrín Eva Auðunsdóttir dvelja nú á Venice Beach í Kaliforníu, á strönd sem er kölluð Muscle Beach. Tilgangur ferðarinnar var meðal annars sá að hitta fjölskyldu Magga í fyrsta skipti, en faðir hans, Júlíus Bess, hefur leitað hennar nú í hartnær fimmtíu ár og loks fundið!

Lífið heyrði í Katrínu sem var í skýjunum enda yfir mörgu að gleðjast en parið á von á sínu öðru barni á aðeins tveimur árum nú í sumar.

„Júlíus Bess, faðir Magga Bess, er búinn að leita að föður sínum í 50 ár, en faðir hans var bandarískur hermaður sem kom hingað í stríðinu. Fullur kraftur var settur í leitina rétt eftir jól og viti menn, hún skilaði árangri þegar börn, barnabörn og systkini föður Júlla eða afa Magga komu í leitirnar en hann er látinn í dag," segir Katrín.

Aðspurð um móttökurnar þegar þau hittu ættingja Magga segir hún þær hafa verið framar öllum vonum. „Þetta er ofboðslega jákvætt og yndislegt fólk sem hefur opnað heimilin sín fyrir okkur og við erum svo velkomin að það er dásamlegt. Það var haldin stór veisla, þar sem fullt af Bessurum komu saman alls staðar að úr Bandaríkjunum á búgarði sem ein af frænkunum á."

Katrín segir alla ættingjana langa að koma til Íslands. „Það er aldrei að vita nema að stórt Bess-ættarmót verði haldið á Íslandi í sumar.

Alltaf dreymt um dvelja erlendis

Katrín og Maggi fóru út í byrjun febrúar og munu dvelja þar fram að miðjum apríl. „Við ákváðum í fyrra að láta drauminn verða að veruleika og prófa að búa hér og æfa. Þar sem við lifum og hrærumst í sportinu þá er mjög gaman að vera á þeim stað í heiminum sem er Mekka líkamsræktarinnar. Maggi, sem vinnur sem vélvirki í Álverinu í Straumsvík ásamt því að þjálfa með, er í fæðingarorlofi um þessar mundir og gat því látið þetta verða að veruleika með mér. Katrín segir Bandaríkjamenn gapa af undrun þegar þeir heyra af því að hann fái sex mánuði í orlof. „Maggi tók mína þrjá mánuði þar sem ég get unnið hvar sem er í heiminum," segir Katrín sem er fullu starfi með fjarþjálfun http://betriarangur.is/.

„Ég vil meina að ég sé í besta starfi í heimi, því ég upplifi persónulegan árangur með öðrum á hverjum einasta degi og það er virkilega gefandi."

14 mánuðir á milli barna

Saman eiga þau Katrín og Maggi Ísabellu Bess, en hún kom í heiminn í mars á síðasta ári en von er á öðru barni í júní. „Við fengum að vita það rétt áður en við fórum út að við eigum von á strák. Það verður fyrsti strákurinn hans Magga, sem er bara yndislegt, það verða því aðeins fjórtán mánuðir á milli Ísabellu og litla bróður hennar." Fyrir á Maggi þær Rögnu Dögg fædda 1991 og Viktoríu Rós fædda 1997. „Þær koma út til okkar yfir páskana og við hlökkum mikið til að fá þær.

Spurð um heilsuna á meðgöngunni og hvernig tilfinning það er að vera með ungt barn og ólétt á sama tíma segist hún mjög heppin.

„Ég er búin að vera ofboðslega heppin á báðum meðgöngunum og þarf að hafa ótrúlega lítið fyrir þessu. Það besta sem ég geri þessa dagana er að skella mér á línuskauta meðfram strandlengjunni hér, með Ísabellu í kerrunni í 27 stiga hita. Ég finn ekkert fyrir því að vera ólétt, svo er Maggi besti pabbi í heimi og gerir allt með dóttur sinni og léttir þar af leiðandi undir með mér en ég vinn mjög mikið."

Katrín Eva, sem hóf feril sinn í fitness fyrir aðeins nokkrum árum, hefur náð einstökum árangri og því forvitnilegt að vita hvort hún ætli sér aftur á pall eftir barneignirnar.

„Ég stefni allavega á að koma mér í gott form eftir meðgöngu, en þannig líður mér best. Ég á bara einn líkama og hugsa því vel um hann. Hvað keppnir varðar þá líður mér eins og ég sé búin að vera að keppa stanslaust síðan ég steig síðast af sviði enda búin að þjálfa ansi margar fitness-stelpur fyrir sviðið og búin að fylgja Magga eftir í allar hans keppnir, hérlendis sem erlendis. En sviðið er vissulega besta gulrótin að „ofurforminu" og þess vegna er aldrei að vita hvað maður gerir, segir Katrín hlæjandi.