Di Canio rekinn af vellii í þriðja skipti á tímabilinu

Paolo Di Canio, þjálfari Swindon Town í ensku D-deildinni, segist ekki ætla að breyta neinu í háttum sínum þrátt fyrir að hafa verið sendur upp í stúku í þriðja skiptið á tímabilinu um helgina.

Di Canio mótmælti kröfuglega þegar hann taldi lið sitt eiga skilið vítaspyrnu í 1-0 sigri á Macclesfield um helgina.

„Ég er ástríðufullur maður og ef ég vil sveifla höndunum út í loftið stöðvar mig enginn," sagði Di Canio við fjölmiðla. Ítalinn var ekki síður ástríðufullur leikmaður en hann kom víða við á löngum ferli. Juventus, Lazio, Celtic og West Ham voru meðal nokkurra félaga sem nutu þjónustu Di Canio sem hefur ekki leynt fasískum skoðunum sínum í gegnum tíðina.

Di Canio sást einnig sparka í afturenda framherjans Matt Ritchie þegar hann gekk af velli í hálfleik.

„Ef knattspyrnusambandið ákærir mig mun ég áfrýja því ef þetta verðskuldaði brottvísun þá verð ég rekinn upp í stúku í hverri viku," sagði Di Canio og bætti við:

„Þótt þeir reki mig upp í stúku 25 sinnum skiptir það ekki máli því ég stýri frábæru liði og við munum engu að síður vinna deildina," sagði Ítalinn skapheiti.

Því fer fjarri að þetta sé í fyrsta skipti sem Di Canio kemst í fréttirnar fyrir brot á lögum knattspyrnunnar. Fyrr í vetur lenti honum saman við leikmann sinn. Þá var hann ákærður af knattspyrnusambandinu fyrir að hlaupa inn á völlinn til að fagna sigurmarki á gamlársdag.

Frægasta atvik Di Canio í enska boltanum var þó þegar hann ýtti dómaranum Paul Alcock í leik Sheffield Wednesday gegn Arsenal árið 1998. Hann uppskar 11 leikja bann og sekt. Atvikið má sjá hér.

Swindon situr í fjórða sæti D-deildarinnar að loknum 26 leikjum, þremur stigum á eftir Southend sem vermir toppsætið.