Nilla refsað af landsliðinu

„Ég átti nú ekki von á því að þeir myndu fara svona illa með mig," segir Nilli úr Týndu kynslóðinni sem mætti á æfingu hjá íslenska handboltalandsliðinu í gær. Hann hafði tapað veðmáli gegn Birni Braga, stjórnanda þáttarins, og fékk markvörðurinn Björgvin Páll Gústavsson, sem er aðalgestur þáttarins í kvöld, að velja refsingu fyrir Nilla.

Björgvin lét Nilla hlaupa yfir völlinn og til baka á meðan leikmenn landsliðsins köstuðu handboltum í átt að honum og áttu að reyna að hitta hann.

„Guðjón Valur kallaði mig vælukjóa en þessir boltar fara á meira en 100 kílómetra hraða og ég hefði getað dáið ef ég hefði fengið þá í hausinn. Þessi refsing var lífshættuleg," segir Nilli sem er þó ekki hættur að halda með íslenska landsliðinu.

„Nei, þetta eru nú góðir strákar inn við beinið," segir hann.

Atriðið má sjá meðfylgjandi þessari frétt en það verður sýnt í Týndu kynslóðinni í kvöld. Þátturinn er í opinni dagskrá á Stöð 2 og Vísi klukkan 19.45.