Umfjöllun og viðtöl: FH - Fylkir 3-4 eftir vítakeppni | Kristján varði þrjú víti FH-inga

Fylkismenn báru sigur úr býtum gegn FH í 32-liða úrslitum borgunarbikarsins en úrslitin réðust í vítaspyrnukeppni. Það var það gamla brýnið Kristján Finnbogason sem var hetja Fylkis en hann varði þrjár spyrnur.

Leikurinn hófst með miklum látum og voru bæði lið greinilega til í slaginn. Fylkismenn voru nokkuð sprækir í upphafi leiksins og þetta 8-0 tap í síðustu umferð Pepsi-deildarinnar virtist ekki hafa mikil áhrif á Fylkismenn. Eftir tæplega korters leik náði Ingimundur Níels Óskarsson, leikmaður Fylkis, að skalla boltann í stöngina. Tveim mínútum síðan fór skalli frá Ingimundi hárfínt framhjá. Ótrúlegt að gestirnir höfðu ekki náð að skora.

Það voru heimamenn sem skoruðu aftur á móti fyrsta mark leiksins eftir rúmlega hálftíma leik þegar Björn Daníel Sverrisson fékk boltann inn í vítateig Fylkis eftir misheppnaða hreinsun. Björn sýndi mikla yfirvegun og þrumaði boltanum óverjandi í netið. Leikurinn róaðist töluvert næstu mínútur og það leit út fyrir að Fimleikafélagið færi með eins mark forystu inn í hálfleikinn. Fylkismenn náðu að jafna metin þegar komið var framyfir venjulegan leiktíma en þar var að verki Jóhann Þórhallsson sem kom boltanum í netið eftir mikinn darraðardans inn í vítateig FH. Staðan því 1-1 í hálfleik.

Síðari hálfleikurinn hófst rólega og liðin nokkrar mínútur að finna taktinn á ný. Fylkismenn voru ívið sterkari þegar leið á síðari hálfleikinn og fengu nokkur ákjósanleg færi til að komast yfir. Hvorugu liðinu tókst að skora mark í síðari hálfleiknum en því þurfti að grípa til framlengingar. Björn Daníel Sverrisson, leikmaður FH, fékk aftur á móti beint rautt spjald rétt undir lok venjulegs leiktíma en Björn tæklaði Björgólf Takefusa, leikmann Fylkis, sem sloppinn var upp völlinn.

Vilhjálmur Alvar, dómari leiksins, var viss í sinni sök og rak Björn Daníel strax útaf. Aðdáendur FH trylltust upp í stúku en dómurinn var í meira lagi umdeilanlegur.

Liðin áttu erfitt með að skapa sér færi í framlengingunni og lítið sem ekkert gerðist á þeim hálftíma. Því þurfti að knýja fram úrslit í vítaspyrnukeppni. Í vítaspyrnukeppninni var það Kristján Finnbogason sem fór á kostum en hann varði þrjár spyrnur og kom Fylki áfram í 16-liða úrslitin. Ótrúlegur en hann er 41 árs.

Ásmundur: Ótrúlegur karakter í liðinu

„Þetta er mikil gleði og ég er gríðarlega ánægður með leikmennina," sagði Ásmundur Arnarsson, þjálfari Fylkis, eftir sigurinn í kvöld.

„Við sýnum alveg gríðarlega mikinn karakter hér í kvöld, en liðið var niðurlægt hér um síðustu helgi. Svona eiga menn að svara slíku og strákarnir stóðu sig ótrúlega vel í kvöld."

„Leikurinn var opin í báða enda og allt gat gerst, því er sætara að klára þennan leik svona. Þetta var frábær skemmtun í kvöld og áhorfendur fengu fyrir allan peninginn í kvöld."

„Það var aldrei spurning þegar út í vítakeppnina var komið, gamli var alltaf með þetta á hreinu."

Hægt er að sjá myndband af viðtalinu við Ásmund hér að ofan.

Heimir Guðjónsson: FH verður að fara sýna stöðuleika

„Ég er rosalega svekktur með spilamennskuna í fyrri hálfleiknum," sagði Heimir Guðjónsson, þjálfari FH, eftir ósigurinn í kvöld.

„Þrátt fyrir að hafa komist í 1-0 þá ákveður liðið allt að fara í sókn að 45. mínútu sem endar með því að við fáum á okkur mark."

„Við vorum skömminni skárri í síðari hálfleiknum og fengum heldur betur tækifæri til að klára dæmið."

„Ég kalla einfaldlega eftir stöðuleika í FH-liðið. Við áttum frábæran leik gegn Fylki um síðustu helgi en síðan mæta menn ekki tilbúnir í kvöld."

Hægt er að sjá myndband af viðtalinu með því að ýta hér.

Kristján: Ég kann þetta ennþá

„Allir leikmenn inná vellinum vorum hetjur og lögðu sig allir gríðarlega mikið fram," sagði Kristján Finnbogason, hetja Fylkis, eftir leikinn í kvöld.

„Maður gleymir ekki þessu sporti, þó svo að líkaminn sé kannski ekki alveg eins góður og í gamla daga. Þetta var ótrúlega gaman og frábært að standa fyrir aftan strákana þegar svona mikil barátta er til staðar."

„Við áttum þennan sigur skilið. Liðið hélt allan tíman í sitt skipulag og börðumst eins og ljón allan tímann. Liðið fékk fín færi í venjulegum leiktíma og hefðum alveg eins getað klárað leikinn mun fyrr."

Hægt er að sjá myndbandið við Kristján með því að ýta hér.