Hallveig Rúnarsdóttir í Salnum á morgun

Hallveig Rúnarsdóttir sópransöngkona flytur íslensk þjóðlög við undirleik Jónasar Ingimundarsonar í Salnum á morgun. Þetta eru aðrir tónleikar haustsins í tónleikaþrennunni Íslenskt? Já takk! en í henni er blaðað í safni íslenskra sönglaga.

Á tónleikum Hallveigar verða meðal annars fluttar Barnagælur Jórunnar Viðar, Ísland farsælda frón og Sofðu unga ástin mín eftir Karl Ottó Runólfsson og Vísur Vatnsenda-Rósu eftir Jón Ásgeirsson.

Hallveig hefur komið fram sem einsöngvari víða um heim og er virkur óratoríusöngvari hér á landi. Á einsöngstónleikum sínum hefur hún jafnan lagt áherslu á ljóðasöng. Tónleikarnir hefjast klukkan 17.30.