Gríðarlega ósáttur við niðurstöðuna - hvetur aðra til að kæra

„Ég er gríðarlega ósáttur og mér finnst þau vera að flýja þetta mál," segir Hallur Reynisson, tvítugur starfsmaður Hagkaupa á Akureyri, sem kærði nokkur fyrirtæki og VR til jafnréttismála í september síðastliðnum. Hann taldi fyrirtækin brjóta jafnréttislög með því að fara eftir hvatningu VR um að veita konum 10 % afslátt af vörum sínum yfir eina helgi. Átakið var til vekja athygli á launamun kynjanna.

Hallur taldi að með því að veita konum sérstakan afslátt væri verið að brjóta gegn lögum um jafna stöðu og jafnan rétt kvenna og karla. Kærunefndin vísaði kærunni frá í dag á þeim forsendum að hann hefði ekki „einstaklingsbundnar hagsmuni" af úrlausn málsins. Í niðustöðunni segir að hann hafi ekki byggt mál sitt á því að hann ætti persónulega hagsmuni umfram aðra einstaklinga af úrlausn málsins. „Þar sem á það hugtaksskilyrði skortir verður því að vísa máli þessu frá kærunefnd."

„Málinu var vísað frá af því ég keypti mér ekki vöru innan hagkaupa þó ég varð vitni að mismunun aftur og aftur. Að segja að ég hafi ekki orðið fyrir þessu misrétti er bara út í hött. Mig langaði að kaupa mér mat en ég ætlaði ekki að láta mismuna mér og fyrir það er mér refsað þannig ég get ekki kært það," segir hann.

„Ég vil meina að það sé lítilmannlega gert að horfa fram hjá þessu og segja: Hann keypti sér ekki epli og því skiptir þetta hann engu máli. Þetta skiptir yfir 50 prósent Íslendinga máli því það eru fjölmargar konur sem fannst þetta niðrandi," segir hann og hvetur þá sem telja á sér brotið til að leggja fram kæru. „Því greinilega má ég ekki kæra þetta átak, segja þau, af því að ég get ekki sýnt fram á að ég keypti mér epli fyrir óhagstæðara verð af því að ég er með lim."

Hallur segist nú íhuga að fara með málið lengra og kæra aftur á öðrum forsendum. Hann hefur nú þegar haft samband við starfsmann hjá Jafnréttisstofu sem ætlar að hjálpa honum með undirbúninginn. „Vonandi hjálpar hún mér," segir hann að lokum.