Umfjöllun: Sama gamla sagan gegn Dönum

Ekkert varð af því að Ísland ynni sinn fyrsta sigur á Dönum á knattspyrnuvellinum í dag þegar liðin mættust í undankeppni EM 2012 á Laugardalsvelli. Danir unnu 2-0 sigur í leiknum.

Varamaðurinn Lasse Schöne kom Dönum yfir á 60. mínútu og Christian Eriksen tryggði þeim endanlega sigurinn stundarfjórðungi síðar.

Bæði mörkin komu með skoti utan teigs eftir að íslenska vörnin svaf á verðinum. Það er þó ekki hægt að segja að Danir hafi boðið upp á neinn sambabolta í kvöld því að Ísland var síst minna með boltann lengst af.

Munurinn var einfaldlega sá að Danir voru mun duglegri að ógna marki andstæðingsins og því fór sem fór.

Fyrsti 30 mínúturnar í leiknum buðu ekki upp á skemmtilega knattspyrnu en Íslendingar hresstust mjög og voru mun sterkari aðilinn síðasta stundarfjórðunginn fyrir hlé.

Ísland var að vinna boltann aftarlega á vellinum og voru fljótir að koma honum upp að marki andstæðingsins. En þá kom saga leiksins - marki gestanna var nánast aldrei ógnað að einhverju ráði. Helst komst Heiðar Helguson nálægt því með skalla eftir horn í lok hálfleiksins en allt kom fyrir ekki.

Síðari hálfleikur var ekki ósvipaður, allavega framan af. Þar til að varamaðurinn Schöne kom Dönum yfir. Allt í einu fengu dönsku miðjumennirnir að athafna sig að vild fyrir utan markteiginn og Schöne þakkaði fyrir sig og þrumaði knettinum í markið.

Fimmtán mínútum síðar kom annað mark og var það ekki ósvipað. Dennis Rommedahl renndi boltanum út á Christian Eriksen sem skoraði með hnitmiðuðu skoti.

Í báðum þessum mörkum leyfðu varnarmenn Íslands þeim Schöne og Eriksen að taka skotið án þess að ógna þeim að verulegu ráði. Stundareinbeitingarleysi sem reyndist afar dýrkeypt.

Ísland vinnur ekki Dani og helst ekki alvöru leik, þrátt fyrir að hafa spilað lengst af ágætlega. Það er niðurstaðan eftir þennan leik. Sagan endurtekur sig, hvað eftir annað, án þess að lausnin finnist. Það verður ekki sakast við leikmenn Íslands að þeir lögðu mikið á sig í kvöld en eins og svo oft áður er ekki spurt að því - úrslitin eru það sem verður skráð í sögubækurnar.

Ísland er því enn með eitt stig í undankeppni EM 2012 eftir fimm leiki.

Ísland - Danmörk 0-2Dómari: Firat Aydinus, Tyrklandi

Skot (á mark): 8-11 (2-6)

Varin skot: Stefán Logi 4 - Sörensen 2

Hornspyrnur: 2-5

Aukaspyrnur fengnar: 15-14

Rangstæður: 2-4