Jólaró í Hörpu

Hin hefðbundna „Jólaró“ Íslensku óperunnar verður haldin í anddyri Hörpu milli klukkan 17 og 18.30 í dag.

Antonía Hevesi, píanóleikari Íslensku óperunnar, fær til liðs við sig góða gesti úr íslenska söngheiminum, þar á meðal söngvara sem tekið hafa þátt í sýningum Óperunnar á liðnum misserum. Í samfelldri dagskrá verða flutt lög og samsöngvar úr heimi bæði jólatónlistar og óperutónlistar. Gert er ráð fyrir að gestir geti komið og farið meðan á söngstundinni stendur, en hún fer fram í anddyri Hörpu. Veitingastaðirnir í Hörpu, verslanirnar 12 Tónar og Epal og miðasala Hörpu verða enn fremur opin á sama tíma.

Þorláksmessa var um árabil haldin hátíðleg í Íslensku óperunni í Gamla bíói en dagskráin hefur nú verið flutt í ný húsakynni óperunnar í Hörpu. Aðgangur er ókeypis.