ZikZak tryggði sér Hálendið

Framleiðslufyrirtækið ZikZak vann kapphlaupið um kvikmyndaréttinn að bók Steinars Braga, Hálendið. Eins og Fréttablaðið greindi frá á dögunum höfðu sjö aðilar sýnt verkinu áhuga en að endingu voru það Þórir Snær Sigurjónsson og félagar sem klófestu gripinn.

Ragnar Bragason, leikstjóri Vaktar-seríanna og Bjarnfreðarson, hefur verið fenginn til að leikstýra myndinni og skrifa handritið og fyrstu áætlanir gera ráð fyrir að tökur hefjist sumarið 2013. „Það er svona fyrsta eðlilega dagsetningin upp á handritaskrif og fjármögnun,“ segir Ragnar sem kveðst ætla að vera trúr höfundarverki Steinars enda segir hann bókina henta hvíta tjaldinu einstaklega vel. Þetta er ekki eina bók Steinars Braga sem ZikZak á kvikmyndaréttinn að, það festi líka kaup á bókinni Konur.

Hálendið gerist, eins og nafnið gefur til kynna, uppi á íslenska hálendinu og segir frá því þegar tvenn hjón úr höfuðborginni verða strandaglópar eftir að bíll þeirra keyrir á hús. Þetta verður önnur íslenska myndin með frekar stuttu millibili sem gerist uppi á hálendinu því eins og komið hefur fram standa nú yfir tökur á vísindaskáldsagnartryllinum Frost í leikstjórn Reynis Lyngdals. Ragnar kveðst ekki hafa neina eina skýringu á því af hverju íslenskir kvikmyndagerðarmenn horfi allt í einu til fjalla. „Ætli menn séu ekki bara að leita inn á við. Þegar erlendir kvikmyndagerðarmenn koma hingað þá fara þeir beint út á land en það hefur ekki mikið verið um það í íslenskum kvikmyndum að undanförnu. Íslenskt hálendi er náttúrlega einstaklega myndrænt.“

Ragnar reiknar með því að hefja tökur á næstu kvikmynd sinni, Málmhaus, í mars á næsta ári. Þorbjörg Helga Dýrfjörð leikur þar aðalhlutverkið en meðal annarra leikara má nefna Halldóru Geirharðsdóttur, Ingvar E. Sigurðsson og Hannes Óla Ágústsson. „Við erum að klára síðustu fjármögnun og hún er alltaf upp á von og óvon enda er umhverfið erlendis erfitt sökum stöðu krónunnar.“

freyrgigja@frettabladid.is