Ríkidómurinn heftandi

Breski leikarinn Benedict Cumberbatch kveðst ráðinn í nokkuð einsleit hlutverk vegna bakgrunns síns, en hann ólst upp meðal efnamanna í Kensington-hverfinu í London. Cumberbatch sló í gegn sem einkaspæjarinn Sherlock Holmes í samnefndum sjónvarpsþáttum frá BBC og fer með hlutverk í kvikmyndinni Tinker, Tailor, Soldier, Spy.

„Ég ólst upp í forréttindastétt. Ég var fljótur að átta mig á því að ég fékk nokkuð einsleit hlutverk vegna bakgrunns míns og lék oftast nokkuð kynlausa, siðblinda snillinga,“ sagði leikarinn, sem stundaði nám við hinn virta Harrow-einkaskóla áður en hann fór út í leiklist.