Umsóknir fyrir Wacken

Umsóknarferlið fyrir Wacken Metal Battle Iceland er hafið og verður þetta í fjórða sinn sem hljómsveitakeppnin er haldin hér á landi. Sigursveitin heldur utan til Þýskalands þar sem lokakeppnin fer fram í ágúst á hátíðinni Wacken Open Air, sem er stærsta þungarokkshátíð veraldar. Uppselt var á hana í nóvember síðastliðnum.

Undankeppnin á Íslandi verður í þetta sinn haldin á stærri stað en áður, á Nasa, 3. mars. Sigurvegarinn verður valinn af dómnefnd skipaðri erlendum jafnt sem innlendum metal-fræðingum.

Nánari upplýsingar má finna á Facebook-síðu keppninnar, en umsóknarfrestur rennur út 22. janúar.

Sigurvegari lokakeppninnar í Þýskalandi hlýtur plötusamning að launum við Nuclear Blast Records.