Gaf kærastanum dýra gítara

Kristen Stewart gerði vel við kærasta sinn, Robert Pattinson, um jólin og gaf honum tvo gamla og verðmæta gítara í jólagjöf, Fender Jazzmaster frá 1959 og K&F Lap Steel frá 1947. Fyrir sögufræga gripina borgaði hún tæpa eina og hálfa milljón og þóttist nokkuð viss um að kærastinn yrði kampakátur með gjöfina. Ástæðan er sú að Pattinson hefur í hyggju að nýta sér ofurfrægð sína í kjölfar velgengni Twilight-myndanna og stefnir í stúdíó til að taka upp sína fyrstu breiðskífu.

„Tónlist var hans fyrsta ást. Hann þjáist þegar hann reynir að gleyma því. Hans dýrmætustu stundir eru þegar hann er í stúdíóinu að spila. Hann á nokkur frumsamin lög en stíf dagskráin hefur ekki gefið honum færi á að taka þau upp fyrr en nú,“ sagði vinur leikarans nýlega.

Stewart gæti velt því fyrir sér hvort hún ætti ekki að gefa honum píanó í afmælisgjöf, því Pattinson hefur verið opinskár um ást sína á hljóðfærinu. „Ég elska píanóið. Mig dreymdi aldrei um að verða leikari þegar ég var yngri. Mig langaði að spila á píanó á bar, vera gamli píanistinn með viskíglasið,“ sagði leikarinn.