Trúir ekki á ást við fyrstu sýn

Bandaríska leikkonan Katherine Heigl, sem gerði garðinn frægan í læknaþáttunum Grey‘s Anatomy, segist alls ekki trúa á ást við fyrstu sýn.

Heigl er gift tónlistarmanninum Josh Kelley og heldur því fram að það hafi verið lyktarhormónin ferómón sem ollu því að hún varð ástfangin af manninum sínum, en þau kynntust þegar Heigl lék í tónlistarmyndbandi fyrir Kelley árið 2005. Hún sagði nýlega í viðtali: „Ég held að ástin vaxi og þroskist þegar maður kynnist manneskjunni betur. Ég trúi samt auðvitað á gagnkvæma hrifningu, það er hægt að laðast að einhverjum og finna fyrir því um leið. En ég lofa, þetta eru ferómónin.“

Heigl sagði að Kelley væri langt frá því að vera sín týpa, og það hefði sannfært hana um mátt lyktarhormónanna. „Það er eitthvað alveg sérstakt við það hvað mér finnst Josh aðlaðandi og kynþokkafullur. Ég var vön að hrífast af brúnaþungum og dularfullum mönnum en Josh er allt öðruvísi. Hann er vingjarnlegur, félagslyndur og ótrúlega jákvæður.“

Hjónin eiga saman tveggja ára ættleidda dóttur, Naleigh.