Stjörnur sungu í Hljómskálanum

Mikið stuð verður í sérstökum áramótaþætti af Hljómskálanum. Ljósmyndari Fréttablaðsins fylgdist með upptökunum.

„Þetta er svona We Are the World-fílingur,“ segir Guðmundur Kristinn Jónsson, Kiddi í Hjálmum. Um þessar mundir standa yfir tökur á áramótaþætti tónlistarþáttarins Hljómskálans sem hefur verið gefið það frumlega nafn Áramótamót Hljómskólans og tengdra aðila. Auk Kidda koma þeir Bragi Valdimar Skúlason og Sigtryggur Baldursson að þættinum en Hljómskálin naut talsverðra vinsælda í haust.

Forsvarsmenn leituðu til fjölda tónlistarmanna til að syngja og leika fyrir þáttinn og meðal þeirra sem troða upp eru Unnsteinn Manúel, Jakob Frímann og Megas auk Ladda. „Þetta eru nokkur lög, Gamlárspartý með Baggalúti og svo nýtt lag sem hefur verið gefið nafnið Skaupið,“ segir Kiddi en allir listamennirnir reyndust meira en lítið fúsir til að leggja sitt á vogarskálarnar enda sennilega margir komnir í jólaskapið.

freyrgigja@frettabladid.is