Keyrir út diskinn í jólaösinni

Felix Bergsson býður upp á óvanalega þjónustu við aðdáendur sína, vini og kunningja. Hann keyrir nefnilega út geisladiskinn sinn, Þögul nóttin, til þeirra sem vilja og óska eftir.

Að sögn Felix hefur hann þegar keyrt út tuttugu til þrjátíu diska, alla áritaða að sjálfsögðu.

„Þetta er bara búið að ganga mjög vel,“ segir Felix þegar Fréttablaðið hitti á hann. „Maður er bara tilbúinn þegar kallið kemur, maður mætir þá bara á svæðið annaðhvort hlaupandi eða bílandi,“ bætir söngvarinn við. Hann er bara einn á ferð þar sem eiginmaðurinn, Baldur Þórhallsson, er önnum kafinn við að fara yfir jólaprófin í Háskóla Íslands.

Á Þögul nóttin eru lög margra af helstu lagahöfundum landsins við ástarljóð Páls Ólafssonar og hefur diskurinn fengið prýðilega dóma, meðal annars fjórar stjörnur í Fréttatímanum og þrjár stjörnur í Fréttablaðinu. Söngvarinn kveðst nokkuð sáttur með sitt, bindur vonir við að hún fari yfir þúsund eintök þegar jólatörninni lýkur. Felix segir samt plötuna ekki hafa vera hugsaða í jólatónaflóðið beint, hann ætlar sér stærri hluti með hana strax eftir áramót. „Núna ætla ég bara að leyfa fólki að hlusta og njóta, það fara síðan fleiri lög í hlustun eftir áramótin og þá ætla ég að fara í tónleikaferðalag um landið.“ - fgg