Semur um nýja þætti

Ricky Gervais er sagður ætla að semja við Channel 4 í Bretlandi um gerð nýrra gamanþátta.

Hinn fimmtugi grínisti hefur þegar búið til prufuþátt fyrir sjónvarpsstöðina og fékk hann mjög góð viðbrögð. Vinnuheiti þáttarins er Derek og gerist hann á dvalarheimili fyrir aldraða. Gervais fer með aðalhlutverkið sem gamalmennið Derek Noakes og vinur hans, Karl Pilkington, verður í sínu fyrsta stóra hlutverki. Fjöldi gestaleikara kemur við sögu í þáttunum, þar á meðal Sir Sean Connery. Síðustu grínþættir Gervais, Life"s Too Short, fengu dræmar viðtökur hjá BBC, sérstaklega miðað við vinsældir The Office sem hann sló í gegn með og þáttanna Extras sem komu í kjölfarið.