Botnleðja sneri aftur á frábærum tónleikum

Hinir árlegu X-mas tónleikar útvarpsrásarinnar X-ins voru haldnir í minningu Hermanns Fannars Valgarðssonar í Kaplakrika á þriðjudagskvöld. Húsið var fullt, andrúmsloftið rafmagnað og þakið ætlaði að rifna af íþróttahöllinni þegar leynigestir kvöldsins, Botnleðja, stigu á svið.

„Þetta var í einu orði sagt frábært," segir Heiðar Örn Kristjánsson, söngvari og gítarleikari Botnleðju.

Sveitin hafði ekki komið fram í sjö ár þegar hún steig á svið í Kaplakrika en Heiðar sagði þá félaga engu hafa gleymt. „Við vorum alveg himinlifandi með þetta. Stemningin var æðisleg og við þurftum ekki að kafa djúpt til að rifja þetta upp."

Nærri 4.000 manns nutu tónlistarinnar í Kaplakrika, en auk Botnleðju steig ótrúlegur fjöldi vinsælustu hljómsveita Íslands á svið. Ágóðinn af tónleikunum rennur óskiptur í sjóð til styrktar fjölskyldu Hermanns.

Aðspurður segir Heiðar þeim Botnleðjuliðum hafa verið ljúft og skylt að taka skóna af hillunni fyrir tónleikana. „Hemmi var góður vinur okkar, bæði í gegnum Botnleðju á sínum tíma og starfið í FH. Þetta var aldrei spurning, okkur langaði að gera þetta."

Heiðar útilokar ekki að sveitin láti meira að sér kveða á næstunni, nú þegar þeir séu komnir í form. „Það er aldrei að vita. Við eigum eftir að hittast og ræða saman strákarnir og fara yfir hvað við viljum gera. Ég get ekki lofað neinu en ég útiloka ekkert."bergthora@frettabladid.is