Cameron lögsóttur

Bryant Moore er handritshöfundur sem sérhæfir sig í vísindaskáldskap. Moore hlýtur að vera ákaflega hugrakkur því hann hefur höfðað mál á hendur James Cameron og 20th Century Fox fyrir kvikmyndina Avatar. Eins og búast mátti við fer Moore ekki fram á neinar smáupphæðir heldur tvo og hálfan milljarð, í dollurum talið.

Moore er þess handviss um að Cameron hafi stolið hugmyndinni sinni úr handriti sínu Aquatica and Descendants: The Pollination. Lögmaður Camerons vísar þessu alfarið á bug. „Hr. Cameron skrifaði handritið að myndinni einn og við höfum haldbærar sannanir fyrir því eins og við munum sýna fyrir dómi," segir Bert Fields lögmaður, sem telur að ásakanirnar séu úr lausu lofti gripnar. Talsmaður Fox tók undir hvert orð, sagði lögsóknina eiga sér enga stoð í raunveruleikanum.

Þetta er ekki fyrsta lögsóknin sem Cameron þarf að verjast því fyrr í mánuðinum skaut maður að nafni Eric Ryder upp kollinum og krafði Cameron um svimandi háar upphæðir fyrir svipaðar sakir. Ryder heldur því fram að Cameron hafi notað hugmyndir sínar í leyfisleysi sem hann hafi kynnt fyrir framleiðslufyrirtæki leikstjórans, Lightstorm Entertainment. - fgg