Árni og Sigtryggur skrifa spennandi fjölskyldudrama

Árni Ólafur Ásgeirsson og Sigtryggur Magnason leiða saman hesta sína við gerð sjónvarpsþáttaraðarinnar Mist. Fjölskyldudrama með spennuívafi, að sögn leikstjórans.

„Þetta er fjögurra þátta sería sem við erum að skrifa,“ segir Árni Ólafur Ásgeirsson kvikmyndagerðarmaður.

Árni leikstýrði síðast hinni margverðlaunuðu Brim sem hann gerði með leikhópnum Vesturporti en er núna að skrifa handrit að sjónvarpsþáttaröð með Sigtryggi Magnasyni sem hefur verið gefið vinnuheitið Mist. Árni segir þetta vera fjölskyldudrama með spennuívafi, ekki þó neina glæpasögu. „Þetta er meira drama en verður vonandi bæði spennandi og skemmtileg.“

Hann segir vinnuna hafa verið í gangi síðastliðið ár og reiknar með því að þeir félagar reki smiðshöggið á handritagerðina í byrjun næsta árs. „Þá verður reynt að fara í fjármögnun. Ég er voðalega spenntur fyrir þessu og sjónvarp er mjög heillandi, það gefur manni meiri tíma til að kanna karaktera og vinna í sögunni. Auðvitað er þetta bara mjög góð afsökun til að gera fjögurra klukkustunda langa bíómynd,“ en upphaflega stóð til að handritið færi á hvíta tjaldið.

„Ef allt gengur að óskum getum við vonandi farið í tökur á næsta ári,“ segir Árni en Snorri Þórisson, eigandi Pegasus, er með þeim í verkefninu.

freyrgigja@frettabladid.is