Cowell viðurkennir ósigur sinn

Simon Cowell hefur viðurkennt ósigur sinn í baráttunni um vinsælsta smáskífulagið um jólin í Bretlandi þrátt fyrir að kapphlaupinu sé ekki lokið.

Stúlknasveitin Little Mix virðist hafa orðið undir í baráttunni við Military Wives, eða kór eiginkvenna hermanna. Kórinn hefur selt 242 þúsund smáskífur með laginu Wherever You Are á aðeins tveimur dögum. Engin smáskífa hefur selst hraðar í Bretlandi síðustu sex ár.

Little Mix vann X-Factor í Bretlandi sem Simon Cowell hefur yfirumsjón með. Þrátt fyrir það hefur þeirra útgáfa af lagi Damien Rice, Cannonball, ekki selst nema í 38 þúsund eintökum. Það er minnsta smáskífusala sigurvegara í X-Factor frá árinu 2004.

„Til hamingju Little Mix og Military Wives. Þetta er frábær málstaður og verðugur sigurvegari í baráttunni um vinsælasta lagið,“ skrifaði Cowell á Twitter-síðu sína.

Ef Military Wives ber sigur úr býtum verður það í annað sinn á þremur árum sem sigurvegarinn í X-Factor nær ekki toppsætinu um jólin. Árið 2009 seldi Rage Against the Machine fleiri smáskífur með laginu Killing in the Name heldur en sigurvegari X-Factor, Joe McElderry.