Nöfnin eru ekkert Baggalútsbull

Baggalútur hefur gefið út 2. hefti Vísdómsrita sinna, sem fjallar um jólasveinana sem komust ekki í úrslit hjá Jóhannesi úr Kötlum.

„Margir halda að misgáfuleg nöfnin á þessum jólasveinum séu bara bull í okkur. En þetta eru nöfn úr gömlum þulum, margir eru jólasveinar sem komust ekki í úrslit hjá Jóhannesi úr Kötlum," segir Baggalúturinn Bragi Valdimar Skúlason um 2. hefti Vísdómsrita Baggalúts, Týndu jólasveinarnir. „Við ætluðum að gefa út ristastórt afmælisrit í tilefni tíu ára afmælis Baggalúts, en nenntum því ekki og ákváðum þess í stað að gefa út ritröð. Lesendur geta átt von á fréttahefti, söngbók og ýmsu fleira."

Sögurnar og vísurnar um þessa lítt þekktu jólasveina voru flestar samdar árið 2003 fyrir jóladagatal Baggalúts á vefnum. „Við dustuðum rykið af þeim, löguðum bragfræðina og fengum Bobby Breiðholt til að myndskreyta. Bobby er svo frábær að við erum að hugsa um að ættleiða hann," segir Bragi Valdimar.

Í bókinni gefur að líta meðal annarra blökkujólasveininn Svartaljót, Sleddu, sem er femínistajólasveinn og kommúnistajólasveininn Rauð, sem kom til byggða í gær. „Í textanum um Rauð er einmitt útskýrt að hann hafi átt í nánum bréfaskriftum við einn kunnasta jólasvein Asíu, Kim Jong Il, sem geispaði einmitt golunni um helgina."

kjartan@frettabladid.is