Vill flytja upp í sveit

Adele hefur í hyggju að yfirgefa Lundúnaborg til að vernda röddina sína. Söngkonan gekkst undir aðgerð á raddböndum í Bandaríkjunum í síðasta mánuði og þurfti að fresta mörgum tónleikum sem höfðu verið fyrirhugaðir. Töluverð mengun er í London sem fer illa með raddböndin og samkvæmt heimildarmanni ætlar hún að flytja upp í sveit.

Fyrr í þessum mánuði sagði Adele aðdáendum sínum að næsta plata sín, sem mun fylgja á eftir hinni vinsælu 21, kæmi ekki út í bráð. Fyrst ætlar hún að semja ný lög og býst hún ekki við nýrri plötu fyrr en eftir tvö til þrjú ár.