Súrefni snýr aftur á X-mas

Hljómsveitin Súrefni snýr aftur eftir tíu ára hlé og spilar á jólatónleikunum X-mas í Kaplakrika.

Súrefni stígur á svið í fyrsta sinn í tíu ár á jólatónleikunum X-mas í Kaplakrika í kvöld. Tónleikarnir eru haldnir í minningu útvarps- og athafnamannsins Hermanns Fannars Valgarðssonar, sem lést langt fyrir aldur fram í nóvember.

„Það lá alltaf beinast við að við myndum spila á tónleikunum. Hemmi starfaði mikið með okkur þegar hljómsveitin var að byrja. Hann var mikið í kringum bandið og það kom eiginlega ekkert annað til greina en að við myndum hóa saman í mannskapinn í þrjú lög,“ segir Páll Arnar Sveinbjörnsson úr Súrefni.

Hann er upphaflegur meðlimur hljómsveitarinnar ásamt Þresti Elvari Óskarssyni. Síðar meir bættust í hópinn þeir Arnar Þór Gíslason trommari og Tómas Tómasson, gítarleikari úr Rokkabillíbandi Reykjavíkur, og ætla þeir fjórir að spila saman í kvöld. „Við erum búnir að taka tvær mjög góðar æfingar og menn hafa engu gleymt. Það verður hrikalega gaman að spila.“

Páll Arnar er einn af þeim sem standa að X-Mas-tónleikunum í ár. „Það var mjög auðvelt að fá hljómsveitirnar og alla sem koma að þessu til að taka þátt. Þetta er búið að vera ótrúlegt verkefni og velvildin og stemningin hefur verið frábær.“

Tónleikarnir hefjast klukkan 18 og miðaverð er 2.000 krónur. Auk Súrefnis koma fram Mugison, Dikta, Of Monsters and Men, Hjálmar, Lay Low, Retro Stefson, Pollapönk, Ensími og fleiri.

freyr@frettabladid.is