Aniston prófaði að nota bótox

Oft hafa verið uppi kenningar um fegrunaraðgerðir Jennifer Aniston en hún hefur hingað til neitað því staðfastlega að hafa átt nokkuð við útlit sitt.

Núna hefur hún þó viðurkennt að hafa prófað að sprauta fegrunarlyfinu bótoxi í andlit sitt en að hún hafi hætt því strax aftur. „Fólk heldur að ég sé alltaf að sprauta mig með bótoxi en ég geri það ekki.

Ég hef hins vegar prófað það og get vel skilið hvernig hægt er að ánetjast því.

Allar þessar fegrunarleiðir fara mér bara alls ekki og ég lít fáránlega út,“ sagði leikkonan í viðtali á dögunum. Aniston var nýverið valin mest aðlaðandi kona allra tíma af tímariti vestanhafs, en hún segir að hún hafi lengi vel ekki verið örugg í eigin líkama. „Mamma mín var fyrirsæta og hugsaði mikið um útlit, þannig að ég gerði uppreisn þegar ég var unglingur sem fólst í því að gerast „goth“.

Það tók mig mörg ár að vera nógu sjálfsörugg til að hætta að fela mig á bak við grímu af farða og líða vel í eigin skinni.“