„Þetta er auðvitað alveg stórkostleg landkynning, burtséð frá okkar markhópi, sem á án efa eftir að opna ýmsar dyr og skila sér í auknum tekjum til ferðamannaiðnaðarins. Enda sýna rannsóknir að hinsegin fólk ferðast mikið og er reiðbúið að eyða töluverðu," hefur Eva María Þórarinsdóttir Lange hjá ferðaskrifstofunni Pink Iceland að segja um þá athygli sem vakin er á Íslandi í fyrrnefndum miðlum. Hún fullyrðir að aldrei hafi verið fjallað jafn mikið og ítarlega um landið á þessum vettvangi.
Segja má að Pink Iceland hafi stuðlað rækilega að þessari athygli þar sem Eva María og sambýliskona hennar og meðeigandi, Birna Hrönn Björnsdóttir, kynntu Ísland sem vænlegan áfangastað á ráðstefnu IGLTA, alþjóðlegra ferðamannasamstaka hinsegin fólks, í Bandaríkjunum fyrr á árinu. Stór hópur fjölmiðlamanna var á staðnum og varð yfir sig hrifinn af því sem Íslendingarnir höfðu til málanna að leggja.
„Við fengum ofsalega góð viðbrögð. Fólk fagnaði ákaft þessum möguleika, meðal annars í ljósi þess að samtökin hafa í gegnum tíðina einblínt svolítið á suðrænar slóðir," segir Eva María og getur þess að í kjölfarið hafi ritstjórar og blaðamenn stærstu miðlanna gert sér sérstaka ferð til landsins. „Þeir áttu ekki til orð af hrifningu yfir náttúrunni, litríku borgarlífi og menningu og voru undrandi yfir að heyra hversu hratt réttindabaráttan hefur gengið fyrir sig. Margir ætla að koma aftur að ári á Hinsegin daga."
Eva María segir ávinninginn af þessari gríðarlegu umfjöllun þegar farinn að skila sér. „Fyrirspurnum og bókunum hefur snarfjölgað hjá Pink Iceland. Þessi markhópur virðist ekki vera bundinn við sumarið eins og níutíu prósent ferðamanna þannig að við ætlum að lengja þetta klassíska tímabil; bjóða upp á hópferðir til Vestfjarða í vetur í samstarfi við Markaðsstofu Vestfjarða ofan á borgarferðir sem hafa notið vinsælda. Enda er íslensk náttúra og verður alltaf helsta aðdráttaraflið."
roald@frettabladid.is
