Sletta úr klaufunum í Eyjafjarðarsveit

Ábúendur á Ytri-Tjörnum í Eyjafjarðarsveit bjóða gestum og gangandi að fylgjast með þegar kúnum á bænum verður hleypt út eftir vetrarinnistöðu, á komandi sunnudag klukkan tólf á hádegi. „Kýrnar fagna því vel og innilega þegar þeim er hleypt úr fjósi og má fastlega búast við að hraustlega verði slett úr klaufum," segir á vef Landssambands kúabænda um viðburðinn.

Ytri-Tjarnir eru við Eyjafjarðarbraut eystri, 13 kílómetra sunnan Akureyrar. Þar er rekið kúabú með 50 mjólkurkúm, ábúendur eru Benjamín Baldursson og Hulda M. Jónsdóttir

Léttar veitingar verða í boði MS Akureyri.

Sú hefð hefur skapast hjá samtökum lífrænna bænda í Danmörku að bjóða gestum í heimsókn þegar kúnum er hleypt út á vorin, og fylgdust 110 þúsund manns með því alls á dögunum þegar kýrnar komust út undir bert loft fyrir sumarið.