Innkalla suðusúkkulaðidropa og spæni

Nói Síríus hefur í samráði við matvælaeftirlit Heilbrigðiseftirlits Reykjavíkur innkallað tímabundið vörurnar Síríus Konsum suðusúkkulaðidropa og Síríus Konsum suðusúkkulaðispæni þar sem ofnæmis- og óþolsvaldar voru ekki nægjanlega vel merktir á umbúðum þessara vara.

Í innihaldslýsingu á umbúðunum kemur fram að að vörurnar innihaldi ýruefnið lesitín. Uppruni lesitínsins er úr soja, en soja og afurðir úr því eru á lista yfir ofnæmis- og óþolsvanda.

Samkvæmt matvælalöggjöfinni eiga ofnæmis- og óþolsvaldar að vera skýrt merktir í merkingum matvæla. Áðurnefndar vörur eru þó fyllilega skaðlausar þeim sem ekki eru viðkvæmir fyrir sojaafurðum.

Umræddar vörur hafa fyrst og fremst fengist í matvöruverslunum og hefur aðallega verið dreift á markað á bökunartímabilinu fyrir jól. Þær eru því ekki í miklu magni á markaði núna en fást þó víða.

Starfsmenn Nóa hafa hafist handa við að taka þessar vörur tilbaka úr verslunum. Dreifing hefur enn fremur verið stöðvuð uns endurmerkingu á umbúðunum er lokið. Þeir neytendur sem eiga umræddar vörur og eru viðkvæmir fyrir sojaafurðum eru beðnir um að farga þeim eða skila þeim til framleiðanda gegn bótum.