Sérstakur saksóknari stofnun ársins að mati SFR

Val á Stofnun ársins og Fyrirtæki ársins er samvinnuverkefni SFR stéttarfélags í almannaþjónustu og VR en þetta er í sjötta sinn sem SFR velur Stofnun ársins. Umfang könnunarinnar hefur aukist umtalsvert frá því í fyrra.

Í ár stóð öllum ríkisstarfsmönnum til boða að taka þátt í könnuninni, óháð stéttarfélagsaðild, en starfsmannaskrifstofa fjármálaráðuneytisins er nú í samstarfi við SFR.  Könnunin náði því til um 19.000 ríkisstarfsmanna og samtals til um 44 þúsund starfsmanna á almennum og opinberum vinnumarkaði. Könnunin sem er stærsta árlega vinnumarkaðskönnunin hér á landi mælir viðhorf starfsmanna til vinnustaðar síns og vinnuumhverfis.

Sérstakur saksóknari var efstur í flokki stærri stofnana (50 starfsmenn og fl.) og fékk einkunnina 4,40, af 5 mögulegum, en Sýslumaðurinn í Vík var efstur í flokki minni stofnana (undir 50 starfsmenn) með einkunnina 4,79. Fjölbrautaskóli Snæfellinga bætir sig mest á milli ára og  er réttnefndur hástökkvari ársins 2011. Hann var í neðsta sæti á lista minni stofnana sem komust á blað í fyrra en er nú í 19 sæti af 85.

Á heildina litið kemur í ljós að aðeins dregur úr ánægju starfsmanna á vinnustöðum, sérstaklega á stærri stofnunum, en fylgni er milli starfsánægju og stærðar stofnana. Starfsfólk á minni stofnunum er almennt ánægðara en á þeim stærri.  Starf og staða starfsmanns innan stofnunar skiptir einnig máli en stjórnendur og starfsfólk með mannaforráð er ánægðara í starfi en aðrir starfsmenn.

Niðurstöður könnunarinnar í ár sýna að vaxandi óánægja er með launakjör, en ánægja með launakjör hefur nú minnkað tvö ár í röð. Í ár eru um 60% starfsmanna óánægðir með launakjör sín.  Í fyrra voru það 51% og árið 2009 voru þeir 44%.  Nokkur munur er á afstöðu kynja en konur eru mun óánægðari með laun sín en karlar. Þær eru hins vegar ánægðari með sveigjanleika í vinnu.

Karlar segja oftar  að ætlast sé til að þeir vinni yfirvinnu , en niðurstaða könnunarinnar bendir til þess að konur fái meira svigrúm til að útrétta í vinnutímanum en karlar. Þær segjast eiga auðveldara með að samræma vinnu og fjölskyldulíf en karlar gera. Einnig segjast konur eiga auðveldara með taka sumarfrí þegar þeim hentar en karlar.