Vilja nefna brú og garð eftir Kurt Cobain

Bæjaryfirvöld í Aberdeen í Washington, heimabæ söngvarans Kurts Cobain, eru að íhuga að nefna brú og lítinn almenningsgarð eftir söngvaranum. Washington Post segir að bæjarstjórnin í Aberdeen hafi boðið íbúum bæjarins að skila inn athugasemdum við tillöguna fyrir næsta bæjarstjórnarfund sem verður haldinn 27. Júlí.

Ef tillagan verður samþykkt mun brú, sem nú heitir Young Street brúin, bera nafn söngvarans. Almenningsgarður í nágrenninu mun þá heita Cobain Landing.

Það fylgir sögunni að nú þegar hafa nokkrir íbúar lagst gegn tillögunni vegna þess hve háður Cobain var fíkniefnum.

Cobain var söngvari og gítarleikari hljómsveitarinnar Nirvana. Hann svipti sig lífi þann 6. Apríl 1994.