Notaði hátíðnihljóð til að þagga niður í stuðningsmönnum mótherjanna

Starfsmaður Hoffenheim, liðs Gylfa Þórs Sigurðssonar í þýska boltanum, hefur verið rekinn eftir að hann varð uppvís að því að nota hátalarakerfi vallarins til þess að þagga niður í stuðningsmönnum mótherjana.

Starfsmaðurinn gerði þetta í 1-0 sigurleik Hoffenheim á móti Borussia Dortmund á laugardaginn en stuðningsmenn Dortmund láta vanalega vel í sér heyra á leikjum liðsins.

Starfsmaðurinn breytti hljóðkerfi vallarins og náði að framkalla hátíðnihljóð sem trufluðu og pirruðu stuðningsmenn Borussia Dortmund sem voru duglegir að syngja níðsöngva um milljarðamæringinn Dietmar Hopp, eiganda Hoffenheim-liðsins.

Starfsmaðurinn áttaði sig víst ekki á hversu alvarlegt þetta var og leit aðeins á þetta sem smá stríðni gagnvart gestunum frá Dortmund.

Hvorki félagið né Dietmar Hopp vissu af þessu uppátæki starfsmannsins. Starfsmaðurinn sætir nú rannsókn og hefur að sjálfsögðu misst starfið sitt á Rhein-Neckar-Arena vellinum.