Selur barnaföt sín í Field‘s

Sandra Berndsen hannar barnaföt undir merkinu Oktober. Hún hefur vakið athygli í Danmörku og hafa föt hennar verið tekin til sölu í stærstu verslunarmiðstöð landsins.

„Það verður spennandi að sjá hvað gerist,“ segir Sandra Berndsen, ungur fatahönnuður búsettur í Kaupmannahöfn. Ný barnafatalína hennar hefur verið tekin til sölu í stærstu verslunarmiðstöð Danmerkur, Field‘s. Búðin sem selur fötin heitir Field‘s Designstore og er orðin vel þekkt ytra fyrir að velja hönnun efnilegra fatahönnuða til sölu í búðinni.

Sandra útskrifaðist úr Københavns Mode- og Designskole árið 2008 og hóf stuttu síðar að hanna undir merki sínu Oktober. Henni bauðst ásamt nokkrum ungum hönnuðum að taka þátt í tískuvikunni í Kaupmannahöfn í fyrra og í kjölfarið kom hún hönnun sinni, aðallega kvenmannsfötum, í sölu í nokkrum litlum hönnunarbúðum í Kaupmannahöfn. Sandra segir það allt annað mál að vera komin inn í Field’s. „Þetta er mjög gott tækifæri. Það eru rosalega margar litlar búðir í hverfunum hérna í Kaupmannahöfn, en að komast inn í Field‘s er eiginlega draumurinn. Þar er allt fólkið og maður er í kringum hinar stóru búðirnar og fær allt aðra athygli.“

Hún segir að margt ólíkt með því að koma sér á framfæri á Íslandi og í Danmörku fyrir ungan fatahönnuð. „Markaðurinn hér er ofboðslega erfiður. H&M og fleiri búðir þar sem hægt er að kaupa ódýr föt gera okkur líka erfiðara fyrir. Heima á Íslandi er fólk miklu meðvitaðra um hönnun og meira fyrir hana. Ég held að það sé aðeins auðveldara að vekja athygli á sér þar.“

Tækifæri eins og þetta býðst ekki án fyrirhafnar að sögn Söndru, sem segir mikla vinnu fólgna í því að koma sér áfram. „Maður þarf stöðugt að vera vakandi fyrir öllum tækifærum sem gætu boðist, og hafa frumkvæði sjálfur líka. Þetta er erfitt en sem betur fer er þetta líka rosalega skemmtilegt.“bergthora@frettabladid.is