Enn meiri Hæ Gosi

„Síðasta sería gekk ógeðslega vel og það eru allir í skýjunum. Það er gríðarlegur hiti fyrir þriðju seríu," segir Baldvin Z, einn af framleiðendum Hæ Gosa á Skjá einum.

Fréttablaðið hefur heimildir fyrir því að taka eigi upp þriðju þáttaröðina af Hæ Gosa á næsta ári. Baldvin vildi ekki staðfesta það í samtali við blaðamann og sagði málið í vinnslu.

Hann er mjög ánægður með áhorfið á aðra þáttaröðina sem var sýnd fyrr á árinu. „Það hafa verið á milli 50 til 60% áskrifenda að fylgjast með þættinum og við erum mjög sátt með það. Það gekk ágætlega með fyrstu seríuna en við bjuggumst engan veginn við því að það yrði eitthvað meira úr þessu."

Fyrsta kvikmynd Baldvins í fullri lengd, Órói, kom út í fyrra og hlaut mjög góðar viðtökur. Næsta mynd hans verður líkast til samstarfsverkefni hans og Birgis Arnar Steinarssonar, Bigga Maus. „Það lítur vel út. Fjármögnun er í gangi og við erum virkilega að vona að við séum í enda næsta árs að fara í tökur."

Baldvin starfar þessa dagana sem aðstoðarleikstjóri vísindatryllisins Frosts sem Reynir Lyngdal leikstýrir. „Það er gaman að vinna með Reyni," segir hann. - fb