Wahlberg hrósar Baltasar

Contraband, Hollywood-mynd Baltasars Kormáks, verður frumsýnd í næsta mánuði. Aðalleikarinn Mark Wahlberg hrósar leikstjóranum fyrir vinnu sína.

Hollywood-stjarnan Mark Wahlberg fer fögrum orðum um íslenska leikstjórann Baltasar Kormák í viðtali sem birtist á vefsíðunni flicksandbits.com í gær.

Tilefnið er kvikmyndin Contraband en allur leikarahópurinn var staddur í New York um helgina þar sem hann sinnti blaðaviðtölum vegna myndarinnar sem verður frumsýnd um miðjan næsta mánuð.

„Hann var frábær og tók hlutina engum vettlingatökum," segir Wahlberg þegar hann er inntur eftir samstarfinu við Baltasar. „Ég held að hann hafi aldrei gert svona dýra mynd eins og Contraband en hann nálgaðist efnið á sama hátt," heldur Wahlberg áfram og lýsir því síðan hversu orkumikill íslenski leikstjórinn hafi verið á tökustað.

„Hann sat ekkert inni í hjólhýsinu sínu með tærnar upp í loft heldur var á þönum nánast allan tímann að sýna mér hvernig ég ætti að klifra í þessu eða hinu atriðinu," segir Wahlberg og bætir því við að hann kunni vel að meta slíkan leikstjórastíl.

„Hann hafði yfirsýn yfir allt og kunni virkilega að stýra leikurum. Hann hafði auðvitað leikið í upprunalegu myndinni og þekkti því söguna eins og lófann á sér."

Wahlberg var það ánægður með Baltasar að þeir tveir hafa ákveðið að gera aðra mynd saman, 2 Guns, sem verður byggð á myndasögu. Viðræður við annan stórleikara standa yfir um þessar mundir en hver það er kemur væntanlega í ljós eftir áramót.

freyrgigja@frettabladid.is