Það geta allir lært töfrabrögð

Einar Mikael töframaður heillaði yngri kynslóðina upp úr skónum á töfrasýningu um helgina. Ágóðinn af sýningunni rann til góðs málefnis.

Töframaðurinn Einar Mikael Sverrisson bauð um helgina upp á ekta töfrasýningu í Hafnarfirði og lét allan ágóða renna óskertan til Mæðrastyrksnefndar. Fullorðnir og börn skemmtu sér saman við að horfa á töfrabrögðin og létu á meðan gott af sér leiða.

Einar segir hugmyndina hafa kviknað þegar hann frétti af því að Mæðrastyrksnefnd Hafnarfjarðar hefði fengið fáa styrki að undanförnu. „Ég ákvað bara að skella upp sýningu og láta verða af þessu. Ég bý sjálfur í Hafnarfirði og mig langaði að gera eitthvað fyrir samfélagið hérna í kringum mig.“

Sýningin er ekki eina leiðin sem Einar hefur nýtt til að hjálpa til, heldur hefur hann styrkt Hringinn og Fjölskylduhjálp með töfradóti sem hann gefur út núna fyrir jólin og segir henta vel í jólapakkana. „Þetta eru lítil stök stykki sem eru rosalega skemmtileg. Brögðin eru einföld og þau eru flott fyrir ungar töfrastelpur og -stráka sem langar að æfa sig að galdra. Þetta hefur vakið mikla lukku,“ segir Einar sem sjálfur fékk brennandi áhuga á töfrabrögðum þegar hann var ungur að árum. „Eitt af stykkjunum sem ég er að gefa út núna er fyrsta töfrabragðið sem ég lærði og gerði þegar ég var þrettán ára. En allir hafa gaman af töfrum, óháð aldri og það er alltaf hægt að byrja að læra töfrabrögð.“

Hægt er að nálgast frekari upplýsingar á síðu Einars, Töfrabrögð.is.

bergthora@frettabladid.is