Innlent

Heiðra minningu Sjonna: Hann batt okkur alla saman

Sex vinir Sigurjóns ætla að flytja lagið hans, Aftur heim, sem eiginkona hans, Þórunn Erna Clausen, gerði textann við. Þetta eru þeir Hreimur Örn, Vignir Snær, Benedikt Brynleifsson, Matthías Matthíasson, Gunnar Ólason og Pálmi Sigurhjartarson.
Sex vinir Sigurjóns ætla að flytja lagið hans, Aftur heim, sem eiginkona hans, Þórunn Erna Clausen, gerði textann við. Þetta eru þeir Hreimur Örn, Vignir Snær, Benedikt Brynleifsson, Matthías Matthíasson, Gunnar Ólason og Pálmi Sigurhjartarson. Mynd/Anton
„Sjonni var mjög spenntur fyrir því að taka þátt, hann hafði lagt mikla vinnu í lagið sitt ásamt Vigni Snæ. Hann hlakkaði mikið til að keppa með það," segir Hreimur Örn Heimisson tónlistarmaður.

Eins og fram hefur komið lést tónlistamaðurinn Sigurjón Brink langt fyrir aldur fram á heimili sínu í síðustu viku. Hann hafði komið lagi að í Söngvakeppni Sjónvarpsins og um tíma ríkti óvissa um hvort lagið, sem kallast Aftur heim, yrði flutt í keppninni. Að endingu tók fjölskylda Sigurjóns þá ákvörðun að halda laginu inni í keppninni og keppir það í kvöld. Sex nánir vinir Sigurjóns munu flytja það: Hreimur, Vignir Snær Vigfússon, Gunnar Ólason, Benedikt Brynleifsson, Pálmi Sigurhjartarson og Matthías Matthíasson.

Lagið sjálft er eftir Sigurjón en textann gerði eiginkona hans, Þórunn Erna Clausen. Hreimur segir að Þórunn hafi hringt í hvern og einn þeirra og spurt hvort þeir treystu sér til að flytja lagið í keppninni. Hreimur var aldrei í neinum vafa hvert svar hans væri.

„Allar vangaveltur og pælingar um keppni eru okkur víðsfjarri. Við viljum bara heiðra minningu Sigurjóns með þessum hætti og flytja það eins vel og við getum. Sigurjón batt okkur alla saman, hann var vinur svo margra og miðjan í þessum hópi. Við lítum allir svo á að enginn komi í staðinn fyrir Sigurjón, við erum allir vinir hans og viljum halda merki hans á lofti. Svo sjáum við bara til, það er enginn með neina háleita drauma."

Hreimur segir síðustu tvær vikur hafa verið ákaflega erfiðar, þær hafi liðið eins og tvö ár. „Þetta hafa verið þung spor og jarðarförin hans var einn af þessum áföngum til að hjálpa okkur að klára þetta og gera andlát hans upp. Við höfum oft grínast með það tónlistarmennirnir að við horfum ekkert of mikið til baka því við erum svo uppteknir af því sem er að gerast á morgun. Þessar tvær vikur hafa kennt manni að maður á að njóta þess að vera til og forgangsraða rétt. Sigurjón var með sína forgangsröðun á hreinu, hann fékk bara ekki tíma til að klára sitt."

freyrgigja@frettabladid.is



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×