Hinsegin dagar fá Mannréttindaverðlaun Reykjavíkurborgar

Jón Gnarr, borgarstjóri, afhenti fulltrúum Hinsegin daga Mannréttindaverðlaun Reykjavíkurborgar við hátíðlega athöfn í Höfða í dag 16. maí, sem er  mannréttindadagur Reykjavíkurborgar.

Í tilkynningu frá borginni segir að verðlaunin séu veitt þeim einstaklingum, félagasamtökum eða stofnunum sem hafi á eftirtektarverðan hátt staðið vörð um mannréttindi tiltekinna hópa. „Markmiðið með mannréttindadeginum er að vekja athygli á þeim málum sem varða mannréttindi borgarbúa og á mannréttindastefnu Reykjavíkurborgar.“

Jón Gnarr sagði við afhendingu Mannréttindaverðlaunanna að samtökin væru vel að viðurkenningunni komin. Að sögn borgarstjóra eiga Hinsegin dagar stóran þátt í þeirri miklu viðhorfsbreytingu sem orðið hafi gagnvart samkynhneigð á Íslandi og endurspeglaðist það meðal annars í endurbótum á lögum sem bæta líf samkynhneigðra.

Þorvaldur Kristinsson, forseti Hinsegin daga, tók við Mannréttindaverðlaununum fyrir hönd samtakanna. Verðlaunin eru keramik listaverk eftir Einar Baldursson, íbúi á Sólheimum í Grímsnesi.