Innlent

Leggja til bann við kynferðislegri misnotkun dýra

Erla Hlynsdóttir skrifar
Mynd úr safni AFP
Nefnd um endurskoðun dýraverndarlaga mun leggja til að kynferðisleg misnotkun dýra verði gerð refsiverð. Þetta segir Kristinn Hugason, formaður nefndarinnar.



Gagnger endurskoðun á dýraverndarlögum stendur yfir og er vonast til að nefndin nái að skila tillögum sínum tímanlega fyrir vorþingið.



Dýraverndarsamband Íslands sendi nefndinni erindi þar sem lögð var áhersla á að samfarir og önnur kynferðismök við dýr verði bönnuð með skýrum lagaákvæðum.



Hvergi talað um misnotkun



Hvergi í íslenskum lögum um dýravernd er nú fjallað um kynferðislega misnotkun þó vissulega sé óleyfilegt að fara illa með dýr. Sömu sögu er að segja um dýraverndarlög í Danmörku, Svíþjóð og Noregi. Dýraverndunarsamtök í þessum löndum berjast þó fyrir lagabreytingum og innan Norræna dýraverndarsambandsins er einhugur um að bann verði lögfest í öllum löndum.



Aðeins hafa rúmlega 80 lönd í heiminum skýr ákvæði um að kynmök fólks við dýr teljist misnotkun, en Holland og Bretland bættust nýlega í hóp þeirra landa.



Innbrot í gripahús



Kynferðisleg misnotkun dýra er af ýmsu tagi, allt frá því sem fólkið sem þar kemur við sögu lítur á sem innileg atlot, til ofbeldisfullra verknaða þar sem dýrin verða sannarlega fyrir líkamlegum skaða og er augljóslega glæpsamlegt dýraníð. Þessu fylgja jafnvel húsbrot, innbrot í gripahús eða að fólk fer í óleyfi inn á afgirt beitilönd.



Ólafur R. Dýrmundsson, formaður Dýraverndarsambandsins, bendir á að fyrir liggja trúverðugar upplýsingar um að íslensk hross hafi verið notuð á dýravændishúsum í Danmörku á síðari árum.



Samkvæmt þeim upplýsingum sem Ólafur hefur aflað sér er fólk sem hefur kynmök við dýr ekki einsleitur hópur. Um er að ræða konur og karla, gagnkynhneigða og samkynhneigða, einhleypa og gifta, á ýmsum aldri.



Dýravændishús erlendis



Að sögn Ólafs hefur misnotkun dýra orði hluti af hinum svokallaða kynlífsiðnaði á síðustu áratugum. Þannig hafa dýravændishús verið sett á laggirnar, auk þess sem klámmyndir hafa verið gerðar með fólki sem hefur samfarir við dýr.



Hvorki Ólafur né Kristinn hafa upplýsingar um umfang kynferðislegrar misnotkunar dýra hér á landi en báðir telja þeir að um einstök undantekningartilfelli sé að ræða. Á síðustu áratugum hafa örfá slík mál ratað í fjölmiðla. Engu að síður þykir þeim mikilvægt að lögbinda bann við kynferðislegri misnotkun á dýrum, með velferð dýranna að leiðarljósi.

Tengd skjöl



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.