Kiriyama Family sigurvegari

Kiriyama Family bar sigur úr býtum í hljómsveitakeppni sem fyrirsætuskrifstofan Eskimo og upptökuteymið Benzin Music/Sýrland stóðu fyrir í tilefni af Ford-keppninni sem verður haldin í Listasafni Reykjavíkur á föstudaginn.

Um þrjátíu hljómsveitir tóku þátt og stóð Kiriyama Family uppi sem sigurvegari með lagið Sneaky Boots. „Ég er mjög sáttur. Það er gaman að senda út fyrsta lagið sitt og vinna keppni í kjölfarið,“ segir Víðir Björnsson, liðsmaður Kiriyama Family.

„Við vissum ekkert hvernig móttökur við myndum fá. Við gáfum lagið út á netinu á miðnætti á gamlárskvöld og ég er nokkuð viss um að þetta sé fyrsta íslenska lagið sem var gefið út á þessu ári.“ Víðir og félagar fá í verðlaun einn dag í hljóðveri og verður sigurlagið tekið upp af Benzin-bræðrunum Daða og Berki Hrafni Birgissonum. Einnig verður gert myndband við lagið sem verður leikstýrt af Ásgrími Má, fatahönnuði og leikstjóra.

Jafnframt mun Kiriyama Family spila fyrir framan fjögur hundruð boðsgesti á Ford-keppninni ásamt hljómsveitunum Feldberg og Sykri.

Andrea Brabin hjá Eskimo er ánægð með þessa nýju hljómsveitakeppni. „Það var rosalega góð þátttaka og ótrúlega mikið af efnilegum böndum, sem kom okkur svolítið á óvart,“ segir hún og vonast til að keppnin verði árlegur viðburður í framtíðinni. - fb

Hér fyrir ofan má sjá myndbandið við lagið Sneaky Boots með Kiriyama Family.