Anelka búinn að finna sér félag

Franski framherji Chelsea, Nicolas Anelka, hefur gefið í skyn að hann sé búinn að finna sér nýtt félag sem hann muni ganga til liðs við í janúar. Chelsea hefur samþykkti óskir Anelka og brasilíska varnarmannsins Alex að vera seldir frá félaginu í janúar.

Samningur Anelka við Chelsea rennur út næsta sumar og tækifæri hans hjá félaginu hafa verið af skornum skammti það sem af er tímabili í ensku úrvalsdeildinni. Hinn 32 ára gamli sóknarmaður hefur einungis þrívegis verið í byrjunarliði liðsins en hann hefur leikið yfir 180 leiki fyrir félagið á síðustu fjórum árum.

Anelka hefur verið orðaður við sitt gamla félag Liverpool og kínverska liðið Shanghai Shenhua. Einnig er vitað af áhuga Harry Redknapp stjóra Tottenham á leikmanninum.

"Ég hef vitað um nokkurt skeið hvar ég mun vera 2. janúar," sagði Anelka á heimasíðu sinni. "Félagið, sem á í nokkrum vandræðum, hefur ákveðið að notast frekar við Chelsea leikmenn framtíðarinnar og þar sem ég er góður atvinnumaður þá hef ég samþykkt það," sagði Anelka enn fremur.