Vilja fá hreindýr á vestfirskar heiðar

Hópur Vestfirðinga áformar að flytja hreindýr til Vestfjarða innan þriggja ára. Þó standa nokkur ljón í veginum en Búnaðarsamband Strandamanna hefur lagst gegn áformunum sem og Halldór Runólfsson yfirdýralæknir meðal annars vegna hættu á að þau smiti riðu eða garnaveiki.

„Ef sýnt verður fram á það með vísindalegum hætti að þau smiti sauðfé á svæðinu þá verðum við fyrstir til að bakka með þessa hugmynd,“ segir Magnús Ólafs Hansson, einn af hvatamönnunum. „Við erum hins vegar ekki til í að láta tala okkur af hugmyndinni bara með einhverjum „af því bara“ rökum. Yfirdýralæknir segist mótfallinn þessu því að hreindýr geti hugsanlega smitað sauðfé. Þetta eru ekki vísindaleg rök.“ Hann segir að hópurinn hafi fengið álit hjá sænska yfirdýralæknisembættinu og þar segir að hreindýr geti ekki smitað sauðfé af riðu eða garnaveiki.

Halldór segist ekki hafa séð þetta álit. „Ég þyrfti að fá að sjá hvaða forsendur þeir gefa sér áður en ég segi eitthvað um það,“ segir hann. „Aðalatriðið er þó það að við viljum láta Vestfirðinga, með sitt hreina svæði, njóta vafans,“ segir hann, „Vestfirðingar hafa algjöra sérstöðu hvað það varðar og því markmiði var náð með miklum fjárútlátum af hálfu ríkisins og eins með miklum fórnum af hálfu bænda. Því er það ekki ásættanlegt að taka hættuna á því að einhverjir sjúkdómar komi upp á svæðinu. Við lítum líka svo á að hagsmunir sauðfjárbænda vegi þyngra en hagmunir hóps manna sem vilja flytja hreindýr á svæðið einungis til að skjóta þau.“

Varðandi það að málið hafi aldrei verið rannsakað segir hann: „Það liggja reyndar fyrir ákveðnar rannsóknir sem Sigurður Sigurðarson dýralæknir gerði og við byggðum okkar álit meðal annars á þeim.“

Hann segir einnig önnur rök renna stoðum undir afstöðu hans. „Í fyrsta lagi vita menn ekki hvort fæðuframboðið sé nægilegt á svæðinu svo að þau þrífist þar,“ segir hann. „Síðan halda engar venjulegar girðingar þessum dýrum, þau gætu þess vegna farið suður í Dali eða eitthvert annað þar sem þeirra er ekki óskað.“

Magnús Ólafs ítrekar að rannsaka verði öll þessi atriði. „Ef það kemur upp úr dúrnum, eftir þá skoðun, að þetta sé ekki gæfulegt þá tökum við því.“ Hann segir enn fremur að kanna þyrfti hversu mörg dýr væri hyggilegt að hafa á svæðinu, en þau gætu hugsanlega verið á bilinu tuttugu til fimmtíu.

jse@frettabladid.is