Vill ekki sjá gömlu fötin

Hollywood-útgáfa Karla sem hata konur er frumsýnd í íslenskum kvikmyndahúsum í dag. Aðalleikkonan Rooney Mara hefur breyst mikið eftir að hún fékk hlutverkið.

Stjarna leikkonunnar ungu, Rooney Mara, rís hratt þessa dagana eftir að hún lék Lisbeth Salander í Hollywood-útgáfu Karla sem hata konur. Mara var valin úr hópi hæfileikaríkra leikkvenna til að taka hlutverkið að sér vegna vilja hennar til að gerbreyta sér og lifa sig inn í hlutverkið. Núna vill leikkonan ekki sjá fötin sem hún átti áður en hún lék í myndinni.

Persónulegur stíll hennar gjörbreyttist á þeim fjórtán mánuðum sem hún eyddi við tökurnar, en eins og lesendur bóka Stiegs Larson þekkja er Salander bæði húðflúruð og götuð um allan líkamann. Mara þykir nú klæða sig mun líkar hinni óttalausu Salander, í dekkri liti og hreinar línur í pönkuðum naumhyggjustíl.

Stíll Möru var áður kvenlegur, unglegur og rómantískur og því er um mikla breytingu að ræða. „Ég endurnýjaði fataskápinn minn algjörlega. Ég var tilneydd, að hluta til vegna hárgreiðslunnar en líka vegna þess að mér leið ekki lengur þægilega í fötunum mínum eftir að ég lifði sem Lisbeth í fjórtán mánuði,“ sagði Mara í viðtali á dögunum, en hún þurfti meðal annars að raka af sér hárið fyrir hlutverkið og láta gata aðra geirvörtuna fyrir hlutverkið.