Kennir Qi Gong á útihátíð

„Þetta er ekki leikfimi heldur lífsmáti og snýst um að læra að gera það sem við getum ekki verið án, að anda,“ segir Gunnar Eyjólfsson um æfingar og hugmyndafræði Qi Gong. Gunnar verður á útihátíðinni Sjálfstætt fólk að Hvölum í Hvalfirði um verslunarmannahelgina til að kenna og kynna æfingarnar.

Sjálfstætt fólk er útihátíð á vegum SÁÁ samtakana og er edrú fjölskylduhátíð um verslunarmannahelgina. Markmiðið er að stuðla að heilbrigðu líferni og eru ýmsar uppákomur skipulagðar með alla aldurshópa í huga. Gunnar hefur verið að kenna Qi Gong undanfarin ár og iðkar það í Grasagarðinum í Laugardal snemma á morgnana. Aðspurður hvort hann haldi að æfingarnar passi á íslenska útihátíð svara Gunnar „Þetta er nú ekki þessi hefðbundna íslenska fylleríshátíð enda engin vímuefni leyfð. Ég er orðin vanur því að kenna fólki Qi Gong og tek því fagnandi að fólk vilji læra æfingarnar enda passa þær fyrir alla. Ef ég er heppinn næ ég að heilla nokkra til að aðhyllast þennan lífsmáta,“ segir Gunnar, sem sjálfur hefur stundað æfingarnar á Íslandi síðan árið 1972.

Auk Gunnars og Qi Gong verða Brahma Kumris og Kundalini hugleiðslur í boði fyrir gesti, svetttjald, sjósund, fimmrithmadans, miðnæturganga og fjöruganga ásamt mörgu fleiru. Einnig er sérstök krakkadagskrá þar sem meðal annars er að finna íþróttamót, Cross-fit og listasmiðju. Jónas Sig, hljómsveitin Valdimar og Of Monsters and Men eru meðal tónlistaratriða en hátíðin hefst föstudaginn 29. júlí. -áp