PJ Harvey og Bon Iver best

Erlend tónlistartímarit eru byrjuð að senda frá sér lista yfir bestu plöturnar á árinu. Tónlistarkonan PJ Harvey er á toppnum í Bretlandi en Bon Iver í Bandaríkjunum. Nú er runninn upp sá tími sem erlend tónlistartímarit senda frá sér árlega plötulista sína yfir bestu útgáfurnar. Það kemur vafalítið fáum á óvart að enska tónlistarkonan PJ Harvey er mest áberandi hjá breskum tónlistarspekúlöntum, enda fékk tíunda hljóðsversplata hennar Let England Shake, frábæra dóma á árinu og einnig hin virtu Mercury-verðlaun.

Harvey er á toppnum bæði hjá Mojo og Uncut en hafnar í öðru sætinu hjá Q á eftir Florence and the Machine. Björk Guðmundsdóttir kemst á lista í öllum bresku tímaritunum með plötuna Biophilia og nær hæst 23. sætinu hjá Q.

Bandaríska tónlistarsíðan Paste Magazine velur aðra plötu Bon Iver, sem er samnefnd bandarísku hljómsveitinni, þá bestu á árinu. Mörgum Íslendingum er það eflaust ferskt í minni þegar Skagapilturinn Helgi Rúnar Bjarnason lék í myndbandi við eitt lag af plötunni, Holocene, fyrr á árinu.

Bon Iver nær fjórða sætinu hjá Q og því níunda hjá Uncut og virðist því hafa fallið vel í kramið beggja vegna Atlantshafsins. Sömu sögu er ekki hægt að segja af Let England Shake með PJ Harvey því hún kemst ekki á lista yfir 50 bestu plöturnar hjá Paste Magazine, ekki frekar en Biophilia-plata Bjarkar.