Ridley Scott sólginn í fisk

Leikstjórinn frægi Ridley Scott ku vera sólginn í fisk og í Reykjavík hefur hann farið tvisvar á veitingastaðinn Fiskmarkaðinn.

Heimildir herma að Scott hafi komið þangað og borðað þegar hann var staddur hér á landi í vor. Þá fékk hann sér níu rétta smakkseðil staðarins og dvaldi lengi ásamt litlum hópi.

Svo mikil var hrifningin að Scott bað um borð á veitingastaðnum um leið og hann lenti á Íslandi í byrjun mánaðarins en þá var hann í átta manna hópi. Í þeirri heimsókn sinni á staðinn fékk hann sér kóngakrabba og karfa sem Scott skolaði niður með úrvals hvítvíni.

Scott hefur greinilega verið að hrósa staðnum á tökustað því nokkrir úr tökuliðinu hafa komið og borðað þegar stund hefur verið milli stríða. Fréttablaðið hafði samband við Hrefnu Rósu Sætran, eiganda Fiskmarkaðarins, sem gat lítið tjáð sig. „Ég get lítið sagt um þetta en margir útlendingar hafa heimsótt staðinn það sem af er sumri.“

Einungis tveir tökudagar eru eftir á Íslandi á stórmyndinni Prometheus en í dag og á morgun fara fram tökur við Dettifoss og aðgangur ferðamanna við náttúruperluna því takmarkaður.

- áp