Íslenskt viðtal slær í gegn

Viðtal Erlings Grétars Einarssonar við Ridley Scott hefur farið eins og eldur í sinu um kvikmyndaheiminn eftir að það birtist á kvikmyndavefsíðu hans, filmophilia.com. Erlingur var meðal blaðamanna á blaðamannafundi Scotts á 101 Hótel skömmu áður en tökur á geimverumyndinni Prometheus hófust hér á landi. Vefsíðurnar Empireonline.com og contactmusic.com eru meðal þeirra sem hafa vitnað í viðtal Erlings, sem sjálfur er forfallinn Alien-aðdáandi.

Aðalfréttin, að mati erlendu miðlanna, er sú að geimveruskrímslið Xenomorph verði ekki í myndinni. Eins og komið hefur fram er Prometheus einhvers konar forleikur að Alien-myndaflokknum fræga og aðdáendur þeirra mynda hoppuðu hæð sína af kæti þegar fréttist af því að Scott væri snúinn aftur á þær slóðir. Þeir vonuðust jafnvel til að fá að sjá Xenomorph í þrívídd. En þeim verður ekki að ósk sinni. „Xenomorph er kominn í Disney-garðinn í Orlando, ég veit ekki hvernig hann endaði þar en hann er sem sagt í Disney-garðinum.“

Tökurnar á Prometheus hér á landi voru gríðarlega umfangsmiklar, en þær fóru að mestu leyti fram við rætur Heklu og svo Dettifoss. Fyrsta stiklan kom á netið í gær og fékk afbragðs viðtökur en með aðalhlutverkin í myndinni fara þau Noomi Rapace, Michael Fassbender og Charlize Theron. Myndin verður frumsýnd í júní á næsta ári. - fgg